Hit is eal gearo, healærna mæst!

Leofan men,

Ic hæbbe asend þis gewrit to eow for þam þe me com swiðe oft on gemynd hu geond Angelcynn ealle men cuðon iu englisc sprecan. Is þæt sægd, þæt on þære tide swa micel leornung æghwær in Breotene wære, þæt from sæ to sæ ofer eall þam iglond cild cuðen on englisc singan ond wepan, ond cuhierdas færinga leoð wyrcan; ac nu þæt se ælmihtiga God geond þas eorðan æghwær þa folc beswingð ond þreað þurh yfle cyningas þe hirum lareowum, mynstrum ond leornungcnihtum nealles wuldor oððe welan giefan nyllan, nu is þæt englisc eall gedruren ond mæg man hit earfoðlice forstandan. Swa clæne is seo lar oðfeallenu þæt feawa nu sindon be eastan Humbre þe on englisc writan cunnon; ond ic wende þæt feawerre sindon be westan Humbre. Eac swa in ealdum Englalonde sindon monige lareowas butan hlaforde; monige þara, ond leorningcnihtas eac, sindon þe in batum sittað on þam sæ ond hira wyrd begeomriende westwearð rowað.

Þa ic þa þis eall gemunde, þa gemunde ic eac hu Ceosere fifel iu his agen geþiode geond ealþeode mærsode on his bloge, ond huru unmæte gestreon goldes ond seolfres begeat for þam þe he sende his boc to ælcum bisceopstole on his hlafordes rice, mid æstele eac, ond sceandlice nidgild him of ofgang. La hwæt, neom ic fifel swa swa is þes Ceosere, ac ic mæg wesan blogere swa he; bistondan me strange geneatas, swa swa Hroðgar cyning ond Beda webhlaford--giese leofan men, eall þæt þe ge gesioð is handweorc; þy we geona rss nabbað, for þam þe Beda nis lareow php:es oððe sql:es þara halga geþioda, þeah þe he þa eallunga rædeð. Þy eac swa, ond swelce for þam þe Beda his reste lufað, is her nan gemotsteðe oððe witan, ond þæt is swa hit beon sceal: ne moton steorflice men mid ealra ylda gastum sprecan. No þy læs is min hyht, þæt ure gewritu eow licað. Gebiddað for us synfullum!


fram Beowulf Ecgþeowing, gewriten on þam .xxvij. blodmonað mmx ymbe 19:00
blog comments powered by Disqus